Аляксандр Лукашэнка «паставіўся спакойна» да адмовы прэм’ер-міністра Арменіі Нікола Пашыняна ехаць на саміт АДКБ у Мінск. Пра гэта заявіла яго прэс-сакратар Наталля Эйсмант.
Паводле Эйсмант, запрашэнне скіравалі Пашыняну гэтак жа, як іншым кіраўнікам дзяржаў: «Прэзідэнту Расіі, напрыклад, таксама падчас нядаўна праведзенай тэлефоннай размовы. Ён запрашэнне прыняў».
Лукашэнка параіў Пашыняну не прымаць паспешных рашэнняў і абдумваць наступныя крокі.
«І зыходзячы са свайго досведу і ўчынкаў у такіх сітуацыях некаторых іншых вядомых палітыкаў, прэзідэнт прапанаваў прэм’ер-міністру Арменіі не спяшацца, не прымаць паспешлівых рашэнняў, а сур’ёзна абдумваць наступныя крокі, якія могуць быць скіраваныя на дэзінтэграцыю», — заявіла Эйсмант.
Нагадаем, напярэдадні стала вядома, што падчас тэлефоннай размовы з ініцыятывы беларускага боку прэм’ер-міністр Арменіі Нікол Пашынян паведаміў, што не паедзе ў Мінск на паседжанне АДКБ.
Нагадаем, Нікол Пашынян даўно і досыць жорстка крытыкуе АДКБ. У лістападзе 2022 года ён не стаў падпісваць сумесную дэкларацыю Савета калектыўнай бяспекі АДКБ праз адсутнасць палітычнай ацэнкі «агрэсіі Азербайджана» супраць суверэнітэту Арменіі.
У траўні гэтага года армянскі прэм’ер заявіў, што, на думку Ерэвана, АДКБ не рэагуе на просьбы адправіць маніторынгавую місію; такім чынам, ствараецца ўражанне, што арганізацыя «сыходзіць з Арменіі». Прэм’ер тады дапусціў, што краіна можа прыпыніць сяброўства ў АДКБ.