У амерыканскім штаце Канзас дзіця перад сном расказаў няньцы, што ў яго пад ложкам сядзіць монстр. Жанчына зазірнула ўніз і ўбачыла мужчыну, які там схаваўся — ім аказаўся былы жыхар дома, да якога ў праваахоўнікаў было шмат пытанняў, паведамілі ў мясцовай паліцыі.
Інцыдэнт адбыўся 24 сакавіка ў доме недалёка ад горада Грэйт-Бэнд. Калі нянька клала дзяцей спаць, адно з іх паскардзілася, што пад ложкам у яго монстр. Каб пераканаць дзіця, што там нікога няма, жанчына зазірнула пад ложак — і тварам да твару сутыкнулася з мужчынам, які там хаваўся.
Паміж імі завязалася бойка, аднаго з дзяцей збілі з ног. Нянька выклікала паліцыю, але зламыснік збег раней, чым тая прыехала.
Тым не менш жанчына пазнала падазраванага — гэта аказаўся 27-гадовы Марцін Вільялобас-малодшы. Раней ён жыў у гэтым доме, але цяпер яму забаронена набліжацца да жылля пасля рашэння суда пра абарону ад гвалту.
Мужчыну заўважылі на адной з гарадскіх вуліц ужо наступнай раніцай. Ён паспрабаваў уцячы, але пасля кароткай пагоні быў затрыманы і змешчаны ў мясцовую турму.
Вільялобасу выставілі абвінавачанні ў выкраданні, крадзяжы з узломам, нанясенні пабояў пры абцяжвальных абставінах, а таксама ў стварэнні пагрозы для дзяцей, перашкаджанні супрацоўніку праваахоўных органаў і парушэнні загаду пра абарону ад жорсткага абыходжання. Ён знаходзіцца пад вартай.
Навошта ён прабраўся ў дзіцячы пакой і схаваўся пад ложкам, не ўдакладняецца.