Найвышэйшы дзяржсавет Саюзнай дзяржавы Беларусі і Расіі плануецца правесці 5 снежня 2024 года. Пра гэта Аляксандр Лукашэнка паведаміў 28 кастрычніка на сустрэчы з першым віцэ-прэм'ерам РФ Дзянісам Мантуравым, перадае яго прэс-служба.
Лукашэнка заявіў, што ад візіту Мантурава ў Беларусь «многае залежыць».
— І мы з прэзідэнтам Пуціным пра гэта гаварылі і чакаем ва ўрадзе Расіі вынікаў вашага візіту ў Беларусь. Для таго каб, калі будуць нейкія пытанні да прэзідэнтаў, мы маглі найбліжэйшым часам іх вырашыць, — сказаў палітык.
У сувязі з гэтым ён заявіў, што 5 снежня плануецца правесці паседжанне Найвышэйшага дзяржсавета (НДС) Саюзнай дзяржавы Беларусі і РФ.
— Таму трэба расставіць усе кропкі над i. Пажадана — на НДС. Каб і наступны, і пазнейшыя гады былі зразумелымі ў супрацоўніцтве для Беларусі і Расіі, — дадаў Лукашэнка.
Найвышэйшы дзяржаўны савет Саюзнай дзяржавы — гэта орган, у склад якога ад Беларусі і РФ уваходзяць лідары краін, прэм’еры і старшыні абедзвюх палат парламентаў — усяго восем чалавек. Рашэнні органа прымаюцца на аснове кансэнсусу. НДС, у ліку іншага, кіруе сумеснай вайсковай дзейнасцю Расіі і Беларусі.
Падчас сустрэчы палітык заявіў, што не выключае магчымасці павелічэння аб’ёмаў фінансавання Расіяй сумесных праектаў, якіх, паводле яго, «дастаткова».
— Нават больш, чым мы дамаўляліся, аб’ёмаў грошай, якія Расія вылучыла ў якасці крэдытаў. Магчыма, мы дамовімся пра тое, што Расія будзе зацікаўленая ў новых нашых праектах і будзе павялічанае гэтае фінансаванне, — сказаў Лукашэнка, адзначыўшы, што гэтаму будуць папярэднічаць міжурадавыя перамовы.
Ён таксама прапанаваў Мантураву «пераадолець недагаворкі» з Расіяй у сферы вытворчасці легкавых аўтамабіляў.
— Ні для кога не сакрэт, мы павінныя абараняць свой рынак. Каб не трапіць з агню ды ў полымя, як я часта кажу. Нашыя калегі гэта разумеюць выдатна. Шляхі супрацоўніцтва з такімі дзяржавамі вызначаныя, яны ёсць. Каб не атрымалася так, як з заходнікамі — пайшлі, усё кінулі — «працаваць не будзем». Праўда, пайшлі — дзякуй, хай ідуць. Кампетэнцыі, людзі засталіся. Сыравіны і рэсурсаў у нас хапае. Будзем вырабляць і замяшчаць іх тавары сваімі, — заявіў Лукашэнка.
Чытайце таксама
