Імёны яшчэ дзесяці з 37 палітвязняў, якіх памілавалі ўказам Лукашэнкі 16 верасня, назваў у сваім тэлеграм-канале экс-рэдактар тэлеграм-канала NEXTA Раман Пратасевіч.
Былі памілаваныя Аляксандр Емяльянаў, Ігар Барысаў, Аляксандр Пастарняк, Уладзіслаў Папоў, Аляксандр Жандораў, Сяргей Мацюхевіч, Яўген Нарэйка, Андрэй Астрацоў, Віталь Чарнавусаў і Зоя Баранава.
Пратасевіч паведаміў, што названыя ім людзі «ўжо дома побач з блізкімі і роднымі».
Нагадаем, 16 верасня, напярэдадні Дня народнага адзінства, Аляксандр Лукашэнка падпісаў указ пра памілаванне яшчэ 37 чалавек, асуджаных за «злачынствы экстрэмісцкай скіраванасці». Дакумент быў падпісаны 16 верасня, паведамілі ў прэс-службе.
Таксама напярэдадні стала вядома, што сярод 37 памілаваных — Аляксандр Фікаў, Таццяна Біруля, Анжэла Сікорская, Міхаіл Корзун, Кацярына Джыга.
Гэта ўжо чацвёртая хваля памілаванняў палітвязняў за апошні час. 4 верасня стала вядома пра выхад на волю 30 асуджаных па палітычных артыкулах. Сярод іх сем жанчын і 23 мужчыны. Большасць з іх — бацькі няпоўнагадовых дзяцей. Раней, 16 жніўня, Лукашэнка памілаваў 30 чалавек, асуджаных за «злачынствы пратэснай скіраванасці». У іх ліку — 14 жанчын і 16 мужчын. Некаторыя маюць сур’ёзныя захворванні.
3 ліпеня на волю выйшлі 18 палітвязняў. Сярод іх — чатыры жанчыны і 14 мужчын, уключаючы Рыгора Кастусёва, які пакутуе на анкалагічнае захворванне.
«Праваабаронцам жа вядомыя прозвішчы 57 палітвязняў, якія выйшлі на волю па памілаванні з ліпеня», — перадае праваабарончы цэнтр «Вясна».
