Лаяльны Пуціну Кадыраў, недахоп рэзерваў у расіян на поўдні, прыхаваная мабілізацыя на акупаваных тэрыторыях. Галоўнае са зводак

15 жнiўня 2023 у 1692103680
«Зеркало»

Ва ўкраінскім Генштабе паведамілі, што УСУ працягваюць стрымліваць наступ расійскіх войскаў у раёне гарадоў Мар'інка і Краснагораўка Данецкай вобласці. У Мінабароны Расіі заявілі, што адбілі 23 атакі УСУ на чатырох напрамках.

Расказваем, пра што яшчэ гаворыцца ў зводках штабоў і справаздачах экспертаў на 538-ы дзень вайны ва Украіне.

Генштаб УСУ: Знішчылі расійскі ўдарны верталёт Ка-52

За мінулыя суткі расійская армія нанесла 14 ракетных і 72 авіяцыйныя ўдары, правяла 63 абстрэлы з рэактыўных сістэм залпавага агню па пазіцыях УСУ і населеных пунктах. Ёсць загінулыя і параненыя сярод цывільнага насельніцтва, паведамляе ўкраінскі Генштаб.

Адбылося больш за 15 баявых сутыкненняў з праціўнікам.

- На Северскім і Слабажанскім напрамках армія РФ нанесла авіяўдары ў раёнах Паўлаўкі і Стэпавага Сумскай вобласці. З мінамётаў і артылерыі абстраляла больш за 25 населеных пунктаў.

- На Купянскім напрамку расійскія войскі нанеслі авіяўдары ў раёнах Іванаўкі, Загрызава Харкаўскай і Стальмахоўкі Луганскай абласцей. Абстралялі больш за 15 населеных пунктаў.

- На Ліманскім напрамку праціўнік нанёс авіяўдары ў раёнах Белагораўкі Луганскай вобласці і Спірнога Данецкай вобласці. З артылерыі абстраляў больш за 25 населеных пунктаў.

- На Бахмуцкім напрамку расіяне нанеслі авіяўдары ў раёнах Васюкоўкі і Кляшчэеўкі Данецкай вобласці. Ад артылерыйскіх абстрэлаў праціўніка пацярпелі больш за 25 населеных пунктаў.

- На Аўдзееўскім напрамку расійская армія нанесла авіяцыйны ўдар у раёне Аўдзееўкі. Артылерыйскім абстрэлам праціўніка падвергліся пяць населеных пунктаў Данецкай вобласці.

- На Мар'інскім напрамку Сілы абароны працягваюць стрымліваць наступ расійскіх войскаў у раёне гарадоў Мар'інка і Краснагораўка Данецкай вобласці. Праціўнік нанёс авіяцыйны ўдар у раёне Краснагораўкі і Новаміхайлаўкі Данецкай вобласці. Абстраляў з артылерыі больш за дзесяць населеных пунктаў.

- На Шахцёрскім напрамку расіяне нанеслі авіяўдары ў раёнах чатырох і абстралялі больш за дзесяць населеных пунктаў Данецкай вобласці.

- На Запарожскім напрамку войска РФ нанесла авіяцыйны ўдар у раёне Новаданілаўкі, абстраляла больш за 20 населеных пунктаў Запарожскай вобласці.

- На Херсонскім напрамку расіяне нанеслі авіяцыйны ўдар у раёне Альгоўкі Херсонскай вобласці. Артылерыйскім абстрэлам ворага падвергліся больш за 20 населеных пунктаў.

У той жа час Сілы абароны Украіны працягваюць вядзенне наступальнай аперацыі на Мелітопальскім і Бярдзянскім напрамках, замацоўваюцца на дасягнутых рубяжах, ажыццяўляюць мерапрыемствы контрбатарэйнай барацьбы.

- Авіяцыя Сіл абароны нанесла ўдар па пункце кіравання, сем удараў па раёнах канцэнтрацыі асабовага складу, узбраення і ваеннай тэхнікі і тры ўдары па зенітна-ракетных комплексах праціўніка.

- Знішчаны расійскі ўдарны верталёт Ка-52.

- Падраздзяленні ракетных войскаў і артылерыі пабілі два раёны канцэнтрацыі асабовага складу, узбраення і ваеннай тэхнікі, тры артылерыйскія сродкі на агнявых пазіцыях і станцыю РЭБ расійскіх сіл.

У Генштабе таксама паведамілі, што на акупаваных тэрыторыях з мэтай папаўнення стратаў праводзяць прыхаваную мабілізацыю. Так, у горадзе Старабельск Луганскай вобласці ўсіх мужчын, якія працуюць на дзяржпрадпрыемствах, прымусілі прайсці медкамісію і стаць на вайсковы ўлік.

Мінабароны Расіі: Перахапілі французскія ракеты вялікай далёкасці SCALP-EG

За суткі УСУ працягнулі спробы наступаць на Запарожскім, Купянскім, Данецкім, Чырвоналіманскім і Паўднёва-Данецкім напрамках.

- На Запарожскім напрамку падраздзяленнямі расійскай групоўкі войскаў пры падтрымцы авіяцыі і артылерыі адбітыя тры атакі штурмавых атрадаў 82-й дэсантна-штурмавой брыгады стратэгічнага рэзерву УСУ ў раёне населенага пункта Рабоціна Запарожскай вобласці.

- На Купянскім напрамку дзеяннямі падраздзяленняў Заходняй групоўкі войскаў, ударамі армейскай авіяцыі і агнём артылерыі адбітыя шэсць атак штурмавых груп 14-й, 32-й механізаваных, 95-й дэсантна-штурмавой брыгад УСУ ў раёнах населеных пунктаў Навасёлаўскае Луганскай і Альшана і Сінькоўка Харкаўскай вобласці.

- На Данецкім напрамку падраздзяленні Паўднёвай групоўкі войскаў у цесным узаемадзеянні з авіяцыяй і артылерыяй адбілі 11 атак падраздзяленняў УСУ ў раёнах населеных пунктаў Белагораўка, Раздолаўка, Краснагораўка і Невельскае Данецкай вобласці.

- На Чырвоналіманскім напрамку дзеяннямі падраздзяленняў групоўкі войскаў «Цэнтр», ударамі авіяцыі і агнём артылерыі адбітыя тры атакі штурмавых груп 68-й пяхотнай і 42-й механізаванай брыгад УСУ ў раёнах населеных пунктаў Новаягораўка, Кузьміно Луганскай і Вясёлае Данецкай вобласці.

- На Паўднёва-Данецкім напрамку ўдарамі авіяцыі, агнём артылерыі, цяжкіх агнямётных сістэм і падраздзяленняў групоўкі войскаў «Усход» нанесенае комплекснае агнявое паражэнне праціўніку ў раёне населенага пункта Прыютнае Запарожскай вобласці. Акрамя таго, спыненая дзейнасць дыверсійна-разведвальнай групы 31-й механізаванай брыгады УСУ.

- На Херсонскім напрамку нанесенае агнявое паражэнне жывой сіле і тэхніцы УСУ.

Усяго за суткі, паводле МА РФ, авіяцыяй, ракетнымі войскамі і артылерыяй нанесенае паражэнне жывой сіле і ваеннай тэхніцы УСУ ў 172 раёнах. У раёне горада Краматорск Данецкай вобласці пабіты пункт кіравання сістэмамі радыёэлектроннай барацьбы і супрацьпаветранай абароны УСУ.

У раёне населенага пункта Амельнік Запарожскай вобласці знішчаны склад боепрыпасаў 43-й артылерыйскай брыгады УСУ.

Сродкамі СПА перахопленыя чатыры крылатыя ракеты вялікай далёкасці SCALP-EG вытворчасці Францыі і два рэактыўныя снарады сістэмы залпавага агню «Ураган». Знішчаныя 25 украінскіх беспілотных лётных апаратаў.

Разведка Вялікабрытаніі: Чачэнскія войскі - невялікі, але прыкметны кампанент расійскіх сіл ва Украіне

Лідар Чачні Рамзан Кадыраў адзначыў намаганні чачэнскага батальёна «Усход Ахмат» у цяжкім баі на Арэхаўскім напрамку ў Запарожскай вобласці. Кадыраў заявіў, што падраздзяленне грае адну з галоўных роляў у гэтай ключавой вобласці. «Усход Ахмат» афіцыйна падпарадкоўваецца 42-й мотастралковай дывізіі Паўднёвай вайсковай акругі, якая дзейнічала ў раёне пасёлка Рабоціна.

Чачэнскія войскі складаюць адносна невялікі, але прыкметны кампанент расійскіх сіл ва Украіне, адзначае разведка Вялікабрытаніі.

«Кадыраў, імаверна, актыўна прапагандуе ролю сваіх падраздзяленняў часткова для таго, каб даказаць сваю рэпутацыю лаяльнага да Пуціна», - адзначаюць у ведамстве.

Інстытут па вывучэнні вайны (ISW): Мінабароны РФ не ўдаецца ўзяць пад кантроль ПВК

Украінскія войскі 14 жніўня вялі контрнаступальныя аперацыі мінімум на двух участках фронту і, як паведамляецца, прасунуліся ў раёне на мяжы Данецкай і Запарожскай абласцей.

• Намесніца міністра абароны Украіны Ганна Маляр паведаміла, што ўкраінскія сілы працягваюць контрнаступальныя аперацыі на Мелітопальскім і Бярдзянскім напрамках.
• Маляр дадала, што ўкраінскія сілы дамагліся пэўных поспехаў на поўдзень і паўднёвы ўсход ад населенага пункта Старамаёрскае ў кірунку Ураджайнага. Маляр адзначыла, што ўкраінскія сілы працягваюць наступ на Ураджайнае, а некаторыя расійскія крыніцы сцвярджалі, што ўкраінскія сілы кантралююць паўночную частку гэтага населенага пункта.

• Аляксандр Хадакоўскі, камандзір батальёна «Усход», які абараняўся пад Ураджайным, паскардзіўся, што расійскія сілы не перакідваюць у гэты раён дадатковых рэзерваў і артылерыйскіх дывізіёнаў. Хадакоўскі сцвярджаў, што сілы, задзейнічаныя ў гэтым раёне, вычарпаныя і нясуць страты.

Раней ISW ацаніў, што расіянам не хапае даступных аператыўных рэзерваў, якія дазволілі б ім праводзіць ратацыю або ўводзіць дадатковыя падмацаванні, праз што расійскія абарончыя лініі могуць быць зламаныя.

• Некаторыя расійскія блогеры сцвярджалі, што УСУ працягвалі контрнаступальныя аперацыі ў раёне населенага пункта Рабоціна ў заходняй частцы Запарожскай вобласці і прасунуліся ў паўднёвай частцы Кляшчэеўкі (7 км на паўднёвы захад ад Бахмута).

• Маляр таксама паведаміла, што за мінулы тыдзень украінскія сілы прасунуліся на тры квадратныя кіламетры на Бахмуцкім напрамку і ўсяго з пачатку наступальных дзеянняў на гэтым напрамку вызвалілі 40 квадратных кіламетраў.

Міністэрства абароны Расіі, імаверна, па-ранейшаму не можа цалкам узяць пад кантроль некаторыя расійскія прыватныя ваенныя кампаніі, лічаць у ISW. Расійскае апазіцыйнае выданне «Дасье» расказала 14 жніўня пра ПВК «Канвой», якая базуецца ў Крыме. Кампанію фінансуе даўні паплечнік прэзідэнта Расіі Уладзіміра Пуціна Аркадзь Ратэнберг і расійскі дзяржаўны банк ВТБ. «Дасье» адзначыла, што «Канвой» не падпарадкоўваецца структурам Мінабароны РФ і мае сваю зону адказнасці ва Украіне і структуру кіравання. Прыватная фінансавая і палітычная падтрымка прыватнай ваеннай кампаніі і яе дзеянні ва Украіне асобна ад каманднай структуры Мінабароны сведчыць пра тое, што расійскае вайсковае ведамства не здольнае цалкам інтэграваць нерэгулярныя фарміраванні ва ўзброеныя сілы, нягледзячы на заяўлены намер зрабіць гэта.

Заснавальнік ПВК «Канвой» Канстанцін Пікалаў раней быў звязаны з ПВК Вагнера і, як паведамляецца, звязаны з Галоўным упраўленнем Генеральнага штаба (ГРУ) Расіі.

На што яшчэ звярнулі ўвагу эксперты:

• расійскія войскі вялі наступальныя дзеянні ў раёне Купянска, на рубяжы Сватава - Крамянная, у раёне Бахмута, на рубяжы Аўдзееўка - Данецк, на мяжы Данецкай і Запарожскай абласцей, у заходняй частцы Запарожскай вобласці і прасунуліся ў раёне Купянска;
• расійская нацыянальная гвардыя працягвае фармаваць новыя палкі і прызначаць прыкметных расійскіх ультранацыяналістаў камандаваць сваімі падраздзяленнямі, магчыма, спрабуючы стымуляваць вярбоўку кантрактнікаў;
• расійскія ўлады звальняюць мясцовых чыноўнікаў на акупаваных тэрыторыях Украіны, імаверна, для таго, каб запоўніць утвораныя вакансіі кандыдатамі, якіх яны хочуць бачыць на блізкіх рэгіянальных выбарах.